San Mamesen festa handia ospatu zen ostegunean, azaroaren 29an, Athletic Cluben 125. urteurrenaren hasiera ekitaldian. Lehoiek Sevillan Real Betisen aurka jokatzen zuten partida zela-eta, Katedralean antolatutako ospakizuna ia perfektua izan zen. Gogoan geldituko da familia athleticzaleak emandako erantzun zoragarria: 22.719 lagun elkartu ziren San Mamesen batera abesteko eta munduan bakarra den klub bateko kide izatearen harrotasuna adierazteko.
Arratsaldea Genuine taldearen ‘haka’ eta Bilboko Abesbatzak, Taberna Ibiltariak, Chimberotarrek eta Iñigo Cabacas Herri Harmailak gidatutako abestiekin hasi zen. Jon Gomezek, zeremonia maisuak, giroa ederto berotu zuen bere energia izugarriarekin. Hasiera-hasieratik hasi zen publikoa lotsarik gabe kantatzen. ‘San Mames, kantuz’, festa handia izan zen, eta emakumezkoen lehen taldeak jarri zuen azken ikutua, harmailarekin batera Athletici ‘Zorionak zuri’ abestuz.
Ondoren, arratsaldeko unerik zirraragarriena iritsi zen. Txetxu Rojori egindako omenaldi handiaren ondoren, ikusleak zutik jarrita eta mito zuri-gorria txalotuz, pantaila erraldoietan Jose Angel Iribar eta Eli Ibarra elezaharrak agertu ziren, 125. urteurreneko bandera ofizialaren igoeraren txanda iritsi baitzen. Bandera Katedralaren estalkira igo zen Agur Jaunak eta Andreak entzuten zen bitartean. Une hunkigarria benetan. Eta azkenik lehoien ordua iritsi zen. Ikusleak sei pantaila erraldoien inguruan bildu ziren Athleticen jokoaz gozatzeko. Berdinketa baino gehiago merezi izan zuten lehoiek Sevillan. Laburbilduz, 125. urteurrenaren estreinaldi biribila izan zen, San Mamesek bizi dituen gau erraldoi horien mailakoa.
