Irailean, egungo San Mamesek bere bizitzako lehen 10 urteak bete ditu. World Design Awards 2020 sarietan Kirol eta Jolas Instalazioen kategorian saritutako estadio baten lehen hamarkadako mugarri batzuk errepasatuko ditugu.
San Mames Berria: 10 urteko mugarriak
San Mames ‘zaharrak’ mende bateko bizitza bete ondoren, eta athleticzaleen eta, oro har, jendearen segurtasun, bertaratze eta erosotasun beharretara egokitutako estadio berria eraikitzea eskatu ondoren, San Mames berriak 2013/2014 denboraldian ekin zion bere ibilbideari.
Haren zerbitzuak eta ikusgarritasuna laster ezagutu ziren nazioartean. 2015ean, San Mames munduko kirol-eraikinik onena izendatu zuten Singapurreko World Architecture Festival jaialdian, eta, ondoren, munduko futbol-estadiorik onena izan zen 2017ko World Football Summit sarietan. Azkenik, World Design Awards 2020 sarietan Kirol eta Jolas Instalazioen kategoriako sari gorena lortu zuen. Sari horiek The Architecture Community erakunde ospetsuak ematen ditu urtero.
Arrakastak San Mames berrian
Kirol arloari dagokionez, San Mames berriko lehen partida Vigoko RC Celtaren aurkako norgehiagoka izan zen, 2013ko irailaren 16an, eta zuri-gorriek 3-2 irabazi zuten, nahiz eta galtzen hasi. Hasierako partida haietan, egungo futbol zelaiak harmaila baten lanak amaitzeke zituen oraindik.
Estadio berria menderaezina izan zen talde bisitarientzat hainbat hilabetez. Izan ere, bisitari gisa irabazi zuen lehen taldea Atletico Madril izan zen, Kopako partidan, 2014ko urtarrilaren 29an Athletic Clubi 1-2 irabazita.
Ligako lehen porrota ez zen 24. jardunaldira arte gertatu, 2014ko otsailaren 16an RCD Espanyolek 1-2 irabazi baitzuen.
San Mames berria ere Txapeldunen Ligako lehoien azken parte-hartzearen lekuko izan da, 2014/15 denboraldian, Napoli gau magiko batean mendean hartuta. Estadioak, lehen aldiz bere harmailak osorik zituela, taldea lagundu zuen garaipena lortzeko. Hamsikek gola sartu zuen atsedenaldiaren atarian, baina Adurizen bi golek eta Ibairenak 3-1ekoa jarri zuten markagailuan, eta, beraz, Athleticek ligaxkarako txartela lortu zuen.
Inauguratu eta bi urtera, San Mames 4-0eko emaitzaren leku izan zen FC Bartzelonaren aurka, urte horretako Superkopako joaneko partidan. Camp Nouko banako berdinketari esker, lehoiek bigarrenez irabazi zuten garaikur hau, eta 2021ean berriro irabaziko zuten.
Bertaratze-maila
Joan den apirilean, orain arteko San Mamesen bertaratze-mailaren errekorra lortu zen. Errekorra Osasunaren aurkako Kopako partidan izan zen, 51.544 zalek ikusi baitzuten, aurreko markan parte hartu zutenak baino 1.803 gehiago, FC Bartzelonaren aurkako martxoaren 12ko norgehiagokan (2023koa ere).
San Mames erreferente ere izan da emakumezkoen futbolarentzat. Izan ere, 2019ko urtarrilean, guztira 48.121 zale bildu ziren estadio zuri-gorrian Athletic Cluben eta Atletico Madrilen arteko Kopako norgehiagoka ikusteko, eta, ondorioz, Estatuan ordura arte emakumezkoen futbol-partida batean izandako ikusle kopuru handiena izan zen.
Futboletik kanpo, Bilboko futbol zelai berrira izandako bertaratze handiena joan den 2018ko maiatzaren 14koa da, 52.282 errugbi zalek gozatu baitzuten Irlandako Leinster Rugby eta Frantziako Racing 92 taldeen arteko Champions Cupeko finalaz.
Kontzertuak
2017ko maiatzaren 30ean, Guns N ‘Roses hard rock taldeak lehen kontzertua eskaini zuen egungo San Mamesen. Hurrengo urtean, azaroaren 3an, “MTV World Stage Bilbao” jaso zuen estadioak, Muse, Crystal Fighters eta Berri Txarrak taldeek osatutako kartelarekin. 38.000 pertsona bildu zituen ikuskizun honek eta “MTV EMAs Bilbao” sarien aurrerapena izan zen.
Eta egun batzuk geroago, ekainaren 11n, Fitok, garai guztietako artista bilbotar arrakastatsuenetako batek, errekorren kontzertua egin zuen San Mamesen. Ikuskizunak 47.000 jarraitzaile bildu zituen, bi ordu eta erdi baino gehiago iraun zuen, eta RTVEk, ETBk eta Youtubek eskaini zuten, besteak beste, milioi bat laguneko audientzia lortuz. Kontzertu historiko eta jendetsua izan zen, San Mames anfitrioia izanik.
Bestalde, 2022ko uztailean, 40.000 lagunen aurrean, Bilbao Bizkaia Rock Day ospatu zen San Mamesen, Metallica iparramerikarrak buru zirela.
Esperientzia paregabeak
Gaur egungo San Mamesek, gainera, esperientzia paregabeak eskaintzen ditu estadiora joaten direnentzat. AC Museoan Athletic Cluben 125 urteko historia ezagutzeko aukera dago, estadioan bertan dagoen dendan artikulu zuri-gorrien bat eros daiteke, edo San Mames Jatetxea, La Campa de los Ingleses edo Geuria ostalaritza-establezimenduetan indarberritzeko leku aproposak dira.
Era berean, San Mames Vip Area, The Lion Experience edo Sky Boxi esker partida bat inoiz ez bezala bizitzeko aukera dago. Era berean, mota guztietako ekitaldiak egiteko aukera ematen du bere guneetan.
Gainera, San Mames berriak nazioarteko kirol ekitaldi garrantzitsuak hartzeko aukera ematen du. Hori dela eta, estadio hau izango da 2024ko maiatzean UEFA Women Champions League-ko finalerako eta 2025ean UEFA Europa League-ko finalerako egoitza.
