Kontzertuak Geuria! tabernara itzuliko dira datorren ostiralean, urriak 27 (21:00etan), Gorka Naste euskal musikari eta ekoizlearen eskutik, eta sarrera doakoa da.
Gorka Naste Gorka Iraragorriren izen artistikoa da, 80ko hamarkadako euskal punk-ska talde onenetako bateko kide ohia, Naste Borraste, alegia, Zer Bizio, Parabellum, Yo soy Julio Cesar, Eskorbuto eta beste hainbat talderen garaikidea.
Gaur egun, hainbat proiektutan parte hartzen du, hala nola Cöverhead, Motörhead-en omenezko banda bat, edo Cigarette Break bikotea, Motown, soul eta funk klasikoak interpretatzen dituena. Hori guztia bere bakarkako lana ahaztu gabe, ostiral honetan, urriak 27, iritsiko baita Geuria! tabernako agertokira. Kontzertua 21:00etan hasiko da eta sarrera doakoa izango da.
“Bi ordu izango dira nire bizitzako soinu-bandaren abestiak joko ditudanak, besteak beste, Lynyrd Skynyrd, ZZ Top, The Police, Sex Pistols, Status Quo, Blackberry Smoke, Motörhead edo Judas Priest taldeenak. Batzuetan Naste Borrasteren abesti batzuk ere egiten ditut”, aurreratu du Gorkak. Gitarra elektrikoarekin eta aurrez grabatutako oinarri erritmikoekin lagunduta eskainiko du kontzertua.
Hau izango da urriko azken kontzertua Geuria! tabernan. Azarorako programatuta daude Los Tessee Rocking Boys (hilaren 17an, 21:00etan, sarrera librea) eta Sutan+Rumbo Paraiso (hilaren 25ean, 20:00etan, 12 euroko sarrera aldez aurretik, 16 euro txarteldegian). Abenduan Basterren kontzertua iragarrita dago (hilaren 23an, 20:00etan, 12 euroko sarrera aldez aurretik, 16 euro txarteldegian).
